ទទួលទានអាហារខាងក្រោម បង្កើនកម្រិតទឹកកាម
Tuesday, June 25, 20130 comments
លោកវេជ្ជបណ្ឌិត Anthony Johan Arciola អ្នកឯកទេសរោគផ្លូវមូត្រ នៅឯមជ្ឈមណ្ឌលវេជ្ជសាស្ដ្រក្រុង ញូវយ៉ក សហរដ្ឋអាមេរិក បានមានប្រសាសន៍ថា បរិមាណ ទឹកកាមបញ្ចេញដោយបុរស ក្នុងអំឡុងពេលឈានដល់ចំណុច កំពូល អាចធ្វើឱ្យគាត់មានក្ដីបារម្ភ ។ លោកវេជ្ជបណ្ឌិតថ្លែងថា វាជារឿងធម្មតាសម្រាប់បុរសម្នាក់ក្នុងការបញ្ចេញទឹកកាម ត្រឹមកម្រិត ១មីលីត្រ រាល់ការរួមភេទម្ដងៗ។ បុរសមានបរិមាណទឹកកាមទាបអាចមានផ្ទុកអាការៈរោគ នៅក្នុងរាងកាយ ដែលកំណត់នូវការផលិតចេញឬសមត្ថភាពបញ្ចេញទឹកកាម។ ខាងក្រោមនេះ គឺជាប្រភេទអាហារមួយចំនួនជំនួយ ដល់ការបង្កើនបរិមាណទឹកកាមដែលបុរសគួរយល់ដឹង ៖
ទឹក ៖ លោកវេជ្ជបណ្ឌិត Arciola បានមានប្រសាសន៍ថា បើគ្មានទឹក ក៏មិនមានផ្នែកណាមួយនៃរាងកាយរបស់មនុស្សអាចបំពេញមុខងារបាន ប្រក្រតីនោះដែរ។ លោកវេជ្ជបណ្ឌិតបានផ្ដល់អនុសាសន៍ឱ្យមនុស្សទទួលទានទឹកយ៉ាងតិច ឱ្យបាន ៨កែវក្នុងមួយថ្ងៃ។ ការទទួលទានទឹកតិចជាងបរិមាណខាងលើ អាចបណ្ដាលឱ្យអ្នកខ្សោះជាតិទឹក។ ខណៈពេលរាងកាយខ្សោះជាតិទឹកនោះ វាមិនអាចផលិតទឹកកាមបានច្រើន ដូចពេលដែលរាងកាយ ទទួលបានកម្រិតជាតិទឹកគ្រប់គ្រាន់នោះទេ។
សាច់សត្វ ៖ យោងតាមគេហទំព័រ Discovery Health បានឱ្យដឹងថា សាច់សត្វសម្បូរដោយសារធាតុចិញ្ចឹមយ៉ាងច្រើនបែប មានសារៈសំខាន់ចំពោះការផលិតចេញទឹកកាមបុរស។ សាច់ត្រី Tuna សាច់មាន់ ទា និងប្រភេទសាច់សត្វពណ៌ក្រហម សម្បូរដោយបរិមាណអាស៊ីដ អាមីណូ ដែលរាងកាយបុរសត្រូវការចាំបាច់ សម្រាប់បង្កើនកម្រិតអ័កម៉ូន Testosterone ឱកើនឡើងខ្ពស់ និងជំនួយដល់ការផលិតចេញទឹកកាម។ អយស្ទឺ(Oysters) មាន់បារាំងសាច់ចៀម និងប្រភេទសាច់សត្វពណ៌ក្រហម ខ្លាញ់តិច សម្បូរដោយសារធាតុស័ង្កសីមានប្រសិទ្ធភាពបង្កើនកម្រិតអ័កម៉ូន Testosterone។
លោកវេជ្ជបណ្ឌិត Arciola បានមានប្រសាសន៍ថា រាងកាយបុរស ក៏ត្រូវការចាំបាច់ នូវសារធាតុស័ង្កសី ដើម្បីផលិតចេញនូវទឹកកាមដែរ។ នៅពេលបុរសបញ្ចេញទឹកកាមម្ដងៗ គឺមានផ្ទុកនូវសារធាតុស័ង្កសីជាមធ្យម ក្នុងចន្លោះ ១ ទៅ៣ មីលីក្រាម។
គ្រាប់ផ្លែឈើ ៖ គ្រាប់ផ្លែឈើ ក៏សម្បូរដោយបរិមាណសារធាតុស័ង្កសីខ្ពស់ និងអាស៊ីដអាមីណូយ៉ាងសម្បូរបែបដែរ។លើសពីនេះទៅទៀត គ្រាប់ផ្លែឈើសម្បូរដោយសារធាតុចិញ្ចឹមយ៉ាងច្រើន សម្រាប់ទ្រទ្រង់រាងកាយបុរសស្ដ្រី។ លោកវេជ្ជបណ្ឌិតបានណែនាំ ឱ្យបុរសទទួលទានគ្រាប់ផ្លែឈើ ១/៤ពែង រាល់ថ្ងៃ ដោយទទួលទានក្នុងពេលទទួលទានរបបអាហារប្រកបដោយតុល្យភាពត្រឹមត្រូវ សម្រាប់សុខភាព។
ធញ្ញជាតិ ៖ ធញ្ញជាតិ Granola និង Oatmeal សម្បូរដោយបរិមាណនៃសារធាតុ L-arginine និងសារធាតុ L-carnitine ខ្ពស់។ ជាលទ្ធផលសារធាតុទាំងពីរប្រភេទខាងលើនេះ អាចបង្កើននូវកម្រិតនៃការបញ្ចេញទឹកកាមបុរសនិងបង្កើននូវសមត្ថភាព មេជីវិត។ សារធាតុស័ង្កសីមាននៅក្នុងប្រភេទស្រូវបាឡេ និងស្រូវសាឡី ក៏មានគុណប្រយោជន៍ជំនួយដល់ការផលិតចេញទឹកកាមរបស់បុរសដែរ។ លោកវេជ្ជបណ្ឌិត Arciola បានថ្លែងថា ការដាក់បញ្ចូលប្រភេទ
អាហារធញ្ញជាតិ ទៅក្នុងរបបអាហារប្រចាំថ្ងៃអាចផ្ដល់ឱ្យអ្នក នូវសារធាតុស័ង្កសី និងអាស៊ីដ អាមីណូគ្រប់គ្រាន់ ដើម្បីបង្កើនកម្រិតទឹកកាមរបស់អ្នក។
បន្លែ និងផ្លែឈើ ៖ លោកវេជ្ជបណ្ឌិតបានផ្ដល់អនុសាសន៍ថា នៅពេលអ្នកព្យាយាម បង្កើនកម្រិតទឹកកាមរបស់អ្នក ចូរបង្កើនការទទួលទានប្រភេទបន្លែស្លឹក ពណ៌បៃតង ដូចជា ស្លឹកផ្ទី ស្លឹក Broccoli បន្លែ okra បន្លែ asparagus និងរុក្ខជាតិដុះក្នុងសមុទ្រពពូកសារាយជាដើម។ អាស៊ីដ អាមីណូ មាននៅក្នុងស្លឹកផ្ទី សារ៉ាយសមុទ្រ ក៏មានប្រសិទ្ធភាពដូចអាស៊ីដអាមីណូមាននៅក្នុង ធញ្ញជាតិ Granola ធញ្ញជាតិ Oatmeal និងសាច់សត្វដែរ។ ប្រភេទបន្លែ Asparagus
Okra និងប្រភេទផ្លែឈើមានជាតិជូរ ផ្ដល់ឱ្យអ្នកនូវសារធាតុអាស៊ីដ Folic មានគុណប្រយោជន៍ ក្នុងការបង្កើនកម្រិតទឹកកាម។
ផ្លែប៉េងប៉ោះ ឪឡឹក ត្របែក និងម្ទេសផ្លោកក្រហម សម្បូរដោយបរិមាណសារធាតុ Lycopene។ លោកវេជ្ជបណ្ឌិតArciola ថ្លែងទៀតថា សារធាតុ Lycopene ជួយបង្កើននូវភាពខាប់ និងកម្រិតទឹកកាមបុរស ហើយសារធាតុ Lycopene នេះមានអត្ថប្រយោជន៍ ចំពោះសុខភាពក្រពេញប្រូស្ដាតបុរសទៀតផង៕