ឯកសារ របស់គណៈកម្មាធិការជាតិបេតិកភណ្ឌពិភពលោក ឲ្យដឹងថា ប្រទេសកម្ពុជា មានបេតិកភណ្ឌចំនួន៤ ដែលត្រូវបានចុះបញ្ជីជាបេតិកភណ្ឌពិភពលោក និងប្រាង្គប្រាសាទជិត១០ទៀត ត្រូវបានដាក់ស្នើសុំចុះបញ្ជីកាលពីឆ្នាំ១៩៩២។
១-ប្រាសាទអង្គរវត្ត នៅខេត្តសៀមរាប៖ ត្រូវបានចុះបញ្ជីជាបេតិកភណ្ឌពិភពលោក ក្នុងឆ្នាំ១៩៩២។ ប្រាសាទនេះ ត្រូវបានកសាងឡើងនៅដើមសតវត្សរ៍ទី១២ ដោយព្រះបាទសូរ្យវរ្ម័នទី២។
(ថ្ងៃទី១៤ ខែធ្នូ ឆ្នាំ១៩៩២)
២- របាំព្រះរាជទ្រព្យ៖ ត្រូវបានចុះក្នុងបញ្ជីតំណាងឲ្យបេតិកភណ្ឌវប្បធម៌អរូបីខាងផ្នែក មនុស្សជាតិក្នុងឆ្នាំ២០០៣។ របាំនេះ រួមបញ្ចូលក្រុមអ្នកសម្ដែង ដែលមានពណ៌ ម៉ូតសំលៀកបំពាក់ ការតុបតែង និងរបាំងមុខខុសៗគ្នា។ ការធ្វើកាយវិការ ការត្រាប់តាមឥរិយាបទ បង្ហាញនូវអារម្មណ៍ ភ័យខ្លាច ការខឹងសម្បារ ការស្រលាញ់ និងភាពរីករាយជាដើម។(ថ្ងៃទី៧ ខែវិច្ឆិកា ឆ្នាំ២០០៣)
៣- ល្ខោនស្រមោលស្បែកធំ៖ ត្រូវបានចុះបញ្ជីតំណាងឲ្យបេតិកភណ្ឌវប្បធម៌អរូបីផ្នែកមនុស្សជាតិ ក្នុងឆ្នាំ២០០៥។ ល្ខោនស្រមោលស្បែកធំ គឺជាទម្រង់សម្ដែងមួយបែប ដែលប្រើប្រាស់ផ្ទាំងរូបឆ្លាក់ពីស្បែក ដែលត្រូវបានសម្តែងនៅពិធីបុណ្យចូលឆ្នាំខ្មែរ ពិធីបុណ្យចម្រើនព្រះជន្មព្រះ មហាក្សត្រ និងពិធីគ្រងរាជ្យ ឬក្នុងពិធីសក្ការៈរបស់ឥស្សរជនល្បីៗ។ តាមឯកសារបង្ហាញថា រូបនេះធ្វើពីបន្ទះស្បែកមួយផ្ទាំង ដែលនៅក្នុងពេលឆ្លាក់នោះ គេត្រូវរៀបចំពិធីយ៉ាងពិសេសតម្រូវទៅតាមតួអង្គអាទិទេពនិមួយៗ។(ថ្ងៃទី
៤- ប្រាសាទព្រះវិហារ៖ ត្រូវបានចុះបញ្ជីជាបេតិកភណ្ឌពិភពលោក ក្នុងឆ្នាំ២០០៨។ ប្រាសាទព្រះវិហារ ស្ថិតនៅលើជួរភ្នំដងរែកក្នុងខេត្តព្រះវិហារ លើរយៈកំពស់ ៦២៥ ម៉ែត្រ។ សំណង់ជាច្រើនបន្តបន្ទាប់ ត្រូវបានកសាងនៅរមណីយដ្ឋាន ប្រាសាទព្រះវិហារនេះ ដោយដំបូងបង្អស់នៅសតវត្សរ៍ទី៩ និងបន្តមកទៀតនៅសតវត្សរ៍ទី១១ ក្នុងរជ្ជកាលរបស់ព្រះបាទ សូរ្យវរ្ម័នទី១ (១០០២ – ១០៥០)។
(ថ្ងៃទី៧ ខែកក្កដា ឆ្នាំ២០០៨)
ឯកសារបង្ហាញថា កម្ពុជាបានរៀបចំដាក់ស្នើរមណីយដ្ឋានចំនួន៩ (ប្រាំបួន)បន្ថែមទៀត ទៅអង្គការ Unesco ដែលមានដូចជា ប្រាសាទបន្ទាយឆ្មារ(ខេត្តបន្ទាយមានជ័យ) ប្រាសាទបន្ទាយព្រៃនគរ(ខេត្តកំពង់ចាម) ប្រាសាទបេងមាលា(ខេត្តសៀមរាប) ប្រាសាទព្រះខ័នកំពង់ស្វាយ(ខេត្តព្រះវិហារ) ក្រុមប្រាសាទសំបូរព្រៃគុក(ខេត្តកំពង់ធំ) ក្រុមប្រាសាទកោះកេរិ៍្ដ(ខេត្តព្រះវិហារ) រមណីយដ្ឋានអង្គបុរីនិងភ្នំដា(ខេត្តតាកែវ) រមណីយដ្ឋានឧដុង្គ(ខេត្តកំពង់ស្ពឺ) និងរមណីយដ្ឋានភ្នំគូលេន(ខេត្តសៀមរាប)៕