រូបដិមា បនទវៈ២អង្គដែលទំនងមានឈ្មោះថា សហទេព និង នកុល ត្រូវបានបញ្ជូនមកដល់ប្រទេសកម្ពុជាវិញហើយនៅល្ងាចថ្ងៃទី១១ ខែមិថុនា នេះ ក្រោមកិច្ចសហការពីសារមន្ទីរ Metropolitan នៅទីក្រុងញូវយ៉ក និងរដ្ឋាភិបាលសហរដ្ឋអាមេរិកផ្ទាល់។
យោងតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី រូបបដិមាដែលតម្លៃដ៏មហាសាលទាំងពីរអង្គនេះ គឺស្ថិតក្នុងចំណោមបងប្អូនប្រុស៥នាក់ក្នុងគ្រួសារបនទវៈ ដែលត្រូវបានកសាងឡើងដើម្បីរំលេចរបៀបជាសិល្បៈនៃជ័យជម្នះរបស់ចក្រភព ខ្មែរនៅសតវត្សរ៍ទី១០របស់ខ្លួននៃរាជធានីកោះកេរ្តិ៍។
រូបបដិមាទាំងនោះ គឺជាផ្នែកមួយនៃនិមិត្តរូបរំលេចឡើងនូវការប្រយុទ្ធគ្នារវាងភីម (ជាបងប្អូនបនទេវៈមួយអង្គទៀត) និងរូបបដិមា ទុរ្យោធនៈ ដែលជាបងប្អូនជីដូនមួយ និងមេដឹកនាំគូប្រយុទ្ធត្រកូលកុរុ។ ការប្រយុទ្ធគ្នានេះ មាននៅក្នុងរឿងព្រេង «មហាភារតៈ» (Mahabharata) ដ៏ល្បីរន្ទឺ ដោយការប្រយុទ្ធនេះមានសាក្សី៧នាក់រាប់បញ្ចូលទាំងព្រះគ្រឹស្នា និងបនទវៈ។
រចនាបទប្រាសាទកោះកេរ្តិ៍ គឺជារចនាបថចម្លាក់ខ្មែរដ៏ល្បីល្បាញបំផុត ដោយលក្ខណៈពិសេសនៃចលនានៅជុំវិញរូបចម្លាក់ បង្ហាញនូវកាយវិការសម្តែងល្ខោន។ នៅទីនោះក៏មានរូបចម្លាក់៩អង្គ ដោយបង្ហាញឲ្យឃើញនូវកាយវិការឈរទ្រឹងអស់រយៈពេលជាង១០០០ ឆ្នាំរហូតដល់ពេលដែលរូបបដិមាទាំងនេះត្រូវបានគេវាយបំបែកចេញពីជើង ទម្រនៅដើមឆ្នាំ ១៩៧០ ។
ពោលគឺនៅពេលដែលកម្ពុជាស្ថិតនៅក្នុងស្ថានភាពសង្គ្រាមស៊ីវិល រូបបដិមាក្នុងនោះមាន បនទវៈ សហទេព និង នកុល ត្រូវបានគេយកឆ្លងដែនដោយខុសច្បាប់ និងដាក់លក់នៅទីផ្សារសិល្បៈអន្តរជាតិ។
នៅអំឡុងពាក់កណ្តាលទសវត្សរ៍ឆ្នាំ ១៩៧០ រូបបដិមា ៧ អង្គ ក្នុងចំណោមរូបបដិមាទាំង ៩ អង្គនេះ ត្រូវបានគេដាក់ដេញថ្លៃ ឬនៅក្នុងសារមន្ទីរផ្សេងៗ និងជាទ្រព្យសម្បត្តិឯកជនជុំវិញពិភពលោក។
នៅឆ្នាំ ១៩៩០ រូបបដិមាមួយអង្គត្រូវបានគេប្រទះឃើញនៅជិតកន្លែងដើមរបស់វាក្នុង ប្រាសាទកោះកេរ្តិ៍ដែលត្រូវបានគេបោះបង់ចោលដោយគ្មានព្រះកេស និងត្រូវបានយកទៅកាន់ទីអភិរក្សអង្គរខេត្តសៀមរាប រីឯជោគវាសនានៃរូបបដិមាទី៩ ដែលគេប្រមូលបាននោះ មិនត្រូវបានគេស្គាល់នៅឡើយ។
សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី ក៏បានឲ្យដឹងផងដែរ រូបបដិមា ទុរ្យោធនៈ ឥឡូវនេះកំពុងស្ថិតនៅជាប្រធានបទនៃការប្តឹងផ្តល់គ្នានៅតុលាការ នៅទីក្រុង ញូវយ៉ក ដែលត្រូវបានប្តឹងដោយមេធាវីសហរដ្ឋអាមេរិក (នៅស្រុកប៉ែកខាងត្បូងក្រុង New York ) តទល់ជាមួយក្រុមហ៊ុន Sotheby នៅញូវយ៉ក ដោយចោទថា វាគឺជាករណីលួចហើយកំពុងតែស្វែងរក ដើម្បីបញ្ជូនរូបបដិមាទៅកាន់ម្ចាស់ដែលមានសិទ្ធិពេញលេញ គឺជាព្រះរាជាណាចក្រកម្ពុជា។
នៅខែមេសា ឆ្នាំ២០១៣ បន្ទាប់ពីមានការពិភាក្សាពិគ្រោះយោបល់លើបញ្ហាពាក់ព័ន្ធ ប្រវត្តិសាស្ត្រ វប្បធម៌ និងផ្លូវច្បាប់ ដោយមានលោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងលោក ច័ន្ទ តានី ដែលជារដ្ឋលេខាធិការ ជាមួយភាគី សារមន្ទីរ Metropolitan នោះ សារមន្ទីររបស់សហរដ្ឋអាមេរិកមួយនេះ បានសម្រេចចិត្តប្រគល់មកឲ្យប្រទេសដើមវិញនូវរូបបដិមា បនទវៈ ២ អង្គ ដែលត្រូវបានគេផ្តល់ទៅកាន់សារមន្ទីរចន្លោះពីឆ្នាំ ១៩៨៧ ដល់ឆ្នាំ ១៩៩២ ។
សម្រាប់កម្ពុជា សេចក្តីសម្រេចចិត្តនេះ បានបង្ហាញឲ្យឃើញនូវក្រមសីលធម៌វិជ្ជាជីវៈស្តង់ដាមានកម្រិតខ្ពស់ របស់សារមន្ទីរ Metropolitan ហើយកម្ពុជាអំពាវនាវដល់សារមន្ទីរផ្សេងៗទៀត និងអ្នកប្រមូលរូបចម្លាក់ទាំងឡាយដែលកំពុងកាន់កាប់រូបចម្លាក់ដែល នៅសល់ទាំងប៉ុន្មានដែលយកចេញពីប្រាសាទចិន ក៏ដូចជាវត្ថុសិល្បៈខ្មែរដែលមានតម្លៃផ្សេងៗទៀត ធ្វើតាមគំរូសារមន្ទីរនេះ ហើយនឹងបញ្ជូនរូបបដិមាទាំងនោះមកប្រទេសកម្ពុជាវិញ។
សម្រាប់រដ្ឋាភិបាលកម្ពុជា ការទទួលបានមកវិញនូវរូបបដិមាដ៏មានតម្លៃមហិមាទាំងពីរអង្គនេះ បានស្ថិតនៅចំពេលវេលាដ៏វិសេសវិសាល ដែលព្រឹត្តិការណ៍នេះកើតឡើងក្នុងអំឡុងពេលកៀកទៅនឹងការចាប់ផ្តើម សម័យប្រជុំលើកទី ៣៧ នៃគណៈកម្មាធិការបេតិកភណ្ឌពិភពលោក ដែលនឹងប្រព្រឹត្តទៅនៅរាជធានីភ្នំពេញ និងសៀមរាប ដោយមានលោក សុខ អាន ជាប្រធាន។
ទីស្តីការគណៈរដ្ឋមន្ត្រីបានអះអាងថា ការប្រគល់មកវិញដោយជោគជ័យនូវរូបបដិមា បនទវៈ ២ អង្គ គឺជាលទ្ធផលបានមកពីយុទ្ធនាការជាសាកល សំរាប់ការការពារបេតិកភណ្ឌវប្បធម៌ ដែលដឹកនាំដោយអង្គការយូណេស្កូ និងការប្តេជ្ញាចិត្តរបស់រាជរដ្ឋាភិបាលកម្ពុជាក្រោមការដឹកនាំ និងចង្អុលបង្ហាញរបស់ សម្តេចនាយករដ្ឋមន្ត្រី ហ៊ុន សែន ដើម្បីស្តារឡើងវិញនូវព្រលឹងវប្បធម៌ជាតិ៕
(ប្រភព៖ ថ្មីៗ)
