ចាប់ពីថ្ងៃទី១៦ស្អែកនេះដល់ថ្ងៃទី២៧ ខែមិថុនា ឆ្នាំ២០១៣
ប្រទេសកម្ពុជានឹងធ្វើជាម្ចាស់ផ្ទះក្នុងការរៀបចំសម័យប្រជុំពេញអង្គ
លើកទី៣៧នៃគណៈកម្មាធិការបេតិកភណ្ឌពិភពលោក។
ដែលនឹងប្រារឰធ្វើជាផ្លូវការក្រោមអធីបតីភាព
ប្រមុខរដ្ឋាភិបាលកម្ពុជា សម្ដេចហ៊ុន សែន
នៅវិមានសន្ដិភាពនាទីក្រុងភ្នំពេញ ប្រទេសកម្ពុជា។
នេះបើយោងតាមសេចក្តីប្រកាសព័ត៌មានរបស់ទីស្តីការគណៈរដ្ឋ
មន្ត្រី។
សេចក្ដីប្រកាសព័ត៌មាននោះបានឲ្យដឹងថា គណៈប្រតិភូប្រមាណ១៣០០នាក់
មកពីប្រទេសចំនួនជាង១២០ ប្រទេសដែលជាសមាជិកអនុសញ្ញាឆ្នាំ១៩៧២
ស្ដីពីការការពារ បេតិកភណ្ឌពិភពលោកវប្បធម៌
និងធម្មជាតិនៃអង្គការយ៉ូណេស្កូ
នឹងចូលរួមក្នុងព្រឹត្ដិការណ៍ជាសកលនេះ។
ទីក្រុងភ្នំពេញ នឹងក្លាយជាទីក្រុងប្រវត្ដិសាស្ដ្រ
នៃការចុះបញ្ជីសម្បត្ដិបេតិកភណ្ឌជាតិរបស់ប្រទេសនានាក្នុងបញ្ជី
បេតិកភណ្ឌពិភពលោក ដែលបច្ចុប្បន្ននេះ
មានសម្បត្ដិបេតិកភណ្ឌពិភពលោកសរុបចំនួន៩៦២រួចជាស្រេច។
សម័យប្រជុំពេញ អង្គនីមួយៗមានភារកិច្ច៖
១-ធ្វើអត្ដសញ្ញាណសម្បត្ដិវប្បធម៌
និងធម្មជាតិដែលមានតម្លៃជាសាកល និងមិនអាចកាត់ថ្លៃបាន
ដោយផ្អែកលើសំណើរបស់រដ្ឋភាគី ដើម្បីទទួលបានការការពារ
អនុលោមតាមអនុសញ្ញា និងដើម្បីចុះក្នុងបញ្ជីបេតិកភ័ណ្ឌពិភពលោក។
២-ត្រួតពិនិត្យស្ថានភាពអភិរក្សនៃសម្បត្ដិវប្បធម៌ដែលបានចុះបញ្ជី
ជាបេតិកភ័ណ្ឌពិភពលោកដោយសហការជាមួយរដ្ធភាគី
និងសម្រេចថាតើមានសម្បត្ដិវប្បធម៌ណា ដែលត្រូវចុះក្នុងបញ្ជី
បេតិកភណ្ឌពិភពលោកក្នុងស្ថានភាពគ្រោះថ្នាក់ ឬដកចេញពីបញ្ជីនេះ
ព្រមទាំងសម្រេចថា
តើសម្បត្ដិវប្បធម៌ណាមួយដែលត្រូវលុបចេញពីបញ្ជីបេតិកភណ្ឌពិភពលោក
។
៣-ពិនិត្យមើលសំណើសុំជំនួយហិរញ្ញវត្ថុអន្ដរជាតិដែលគាំទ្រថវិកាដោយមូលនិធិបេតិកភ័ណ្ឌពិភពលោក។
គួរកត់សម្គាល់ថា នេះគឺ
ជាកិច្ចប្រជុំធំមួយទៀតសម្រាប់ប្រទេសកម្ពុជា
បន្ទាប់ពីបានរៀបចំកិច្ចប្រជុំកំពូលអាស៊ាន
កាលពីឆ្នាំ២០១២កន្លងទៅនេះប្រកបដោយជោគជ័យ៕
(ដោយៈឃួន សុភ័ក្រ)
ប្រភព៖វាយោអេហ្វអ៊ឹម