មានពេលខ្លះមនុស្សយើងម្នាក់ៗមិនអាចយល់ពីចិត្តរបស់ខ្លួនបានទេ ព្រោះថាមានពេលខ្លះមាត់របស់អ្នកបាននិយាយថាអ្នកមិនបានស្រឡាញ់គេទេ ប៉ុន្តែនៅវពេលឃើញគេដើរជាមួយនារីដទៃក៏មានអារម្មណ៍មិនសប្បាយចិត្ត។ ចូរ សាកល្បងពិនិត្យមើលអារម្មណ៍ខ្លួនជាមួយនិងចំណុចខាងក្រោមដែលបានបង្ហាញជូន ៖
- អ្វីៗសុទ្ធតែអស្ចារ្យ និងស្រស់ស្អាតសម្រាប់រូបគេ៖ ពេលដែលអ្នកចាប់ផ្ដើមលួចស្រឡាញ់គេ អ្នកនឹងមើលទៅគេឃើញតែអ្វីដែលល្អៗ។ កាន់តែសម្លឹង កាន់តែឃើញគេល្អ គេស្អាត គ្មានអ្នកណាអាចល្អដូចគេបានឡើយ។
- ចេះតែនឹកឃើញគេគ្រប់ពេលវេលា៖ បើកភ្នែកមិនទាន់ ចាប់ផ្ដើមនឹកដល់គេមុនគេបង្អស់ ទោះបីឃើញមុខគ្នារាល់ថ្ងៃ ក៏អ្នកមានអារម្មណ៍ថា ចង់ឲ្យឆាប់ភ្លឺ នឹងអាលបានទៅជួបមុខគេ បើមិនអញ្ចឹងអ្នកប្រហែលមិនអាចធ្វើការអ្វីបានឡើយ។
- គិតពីគេភ្លេចគិតពីខ្លួនឯង៖ អ្នករវល់តែខ្វល់ពីការលំបាករបស់គេ ទោះបីគេមិនបានសុំឲ្យជួយក៏អ្នកឈឺឆ្អាល ទោះបីគេស្ដីឲ្យ ក៏មិនខ្វល់។ ឈឺឆ្អាលជាមួយគេ រហូតភ្លេចគិតពីការលំបាកខ្លួនឯង។
- មានអារម្មណ៍ភ័យពេលជួបមុខគេ៖ ស្ទើរតែគ្រប់ពេលតែងតែចង់ជួបមុខគេ តែពេលបានជួបមុខគេបែរជាមានអារម្មណ៍ភ័យៗ ដូចចង់ហោះម៉េចមិនដឹង។ ទោះជាយ៉ាងណា បើមិនបានជួបមុខគេ ប្រហែលញ៉ាំបាយមិនចូល។
- ចេះច្រណែន និងចេះអន់ចិត្ត៖ អ្នកនឹងមានអារម្មណ៍ចង់ធ្វើម្ចាស់កម្មសិទ្ធិលើបេះដូងរបស់គេ តែអ្នកមិនអាចសម្ដែងឲ្យគេដឹង។ បើពេលណាអ្នកបានឃើញគេនិយាយជាមួយមនុស្សផ្ទុយភេទក្រៅពីអ្នក អ្នកនឹងមានអារម្មណ៍ច្រណែនមួយរំពេច។
- សំឡេងគេពីរោះដូចសារិកា៖ រាល់ពេលបានស្ដាប់គេនិយាយ ដូចបានស្ដាប់ចម្រៀងមួយបទអីចឹង។ អ្នកពេញចិត្តនឹងស្ដាប់គ្រប់រឿងដែលគេនិយាយ ទោះវែងប៉ុណ្ណាក៏ដោយ។
- អួតប្រាប់ពិភពលោកថាគេល្អ៖ ពេលអ្នកលួចស្រឡាញ់នរណាម្នាក់ អ្នកនឹងនិយាយពីគេម្នាក់នោះប្រាប់អ្នកដទៃឲ្យស្គាល់ និងដឹងពីចំណុចល្អៗរបស់គេឲ្យបានច្រើន។
- ដេករមួលលើគ្រែ៖ ពេលមិនទាន់ចេះស្រឡាញ់គេ គ្រែរបស់អ្នកដូចកំណាត់ឈើមួយដុំ តែដល់ពេលចេះលួចស្រឡាញ់គេភ្លាម ចាប់ផ្ដើមចេះអង្អែលគ្រែ ភួយ ហើយគិតថាមិនដឹងមានក្តីសុខយ៉ាងណាទេ បើបានគេមកគេងលើគ្រែជាមួយគ្នា។
- ភ្លេចពីការឈឺចាប់ជាមួយសង្សារចាស់៖ បើអ្នកដែលធ្លាប់មានការបែកបាក់ជាមួយសង្សារ ហើយតែងតែនឹកឃើញពីការឈឺចាប់ទាំងនោះ តែបែរជាឥឡូវស្ទើរតែភ្លេចមុខសង្សារចាស់ និងទង្វើរបស់គេមកលើអ្នកនោះ មានន័យថាពេលនេះអ្នកបានមើលឃើញអ្នកថ្មីមកជំនួសក្នុងបេះដូងរបស់អ្នកហើយ។
- ចូលចិត្តស្ដាប់បទចម្រៀងបែបស្នេហា៖ តាំងពីមានអារម្មណ៍លួចស្រឡាញ់គេមក ចូលចិត្តតែស្ដាប់បទចម្រៀងណាដែលមានលក្ខណៈមនោសញ្ចេតនា ស្នេហាផ្អែមល្ហែម។ ពេលខ្លះ ពេលឮបទណាមានលំនាំស្រដៀងនឹងរឿងខ្លួនឯងនោះ កាន់តែចូលចិត្តស្ដាប់បទនោះ ម្ង៉ៃរាប់សិបដង។
តើចំណុចដែលបានរៀបរាប់ខាងលើនេះ មានចំណុចណាដែលអ្នកកំពុងតែមានវាដែរឬទេ? ប្រសិនជាអ្នកកំពុងតែមានចំណុចទាំងនេះ មិនបាច់គិតច្រើននោះទេ ព្រោះថាពេលនេះអ្នកកំពុងតែធ្លាក់ក្នុងអន្លង់ស្នេហ៍របស់គេហើយ។
