ភ្នំពេញ: កីឡាការិនីតេក្វាន់ដូជាបងប្អូនបង្កើត ស៊ន ដាវីន និង ស៊ន សៀវម៉ីដែលធ្លាប់ដណ្តើមបានមេដាយថ្នាក់អន្តរជាតិជូនកម្ពុជានោះ ត្រូវបានគណៈកម្មាធិការជាតិអូឡាំពិកកម្ពុជា(NOCC) បញ្ជូនទៅហ្វឹកហាត់នៅសមាគមកីឡាតេក្វាន់ដូយ៉ុងឈុននៃប្រទេសកូរ៉ខាង ត្បូងរយៈពេល៦ខែកាលពីរាត្រីថ្ងៃសុក្រ កន្លងមកនេះ ដើម្បីត្រៀមខ្លួនចូលរួមការប្រកួតស៊ីហ្គេមលើកទី២៧នៅមីយ៉ាន់ម៉ានា ចុងឆ្នាំ២០១៣នេះ។
ការទទួលបាននូវអាហារូបករណ៍របស់ ស៊ន ដាវីន និង ស៊ន សៀវម៉ី គឺបន្ទាប់ពីNOCCនិងសមាគមតេក្វាន់ដូរបស់កូរ៉េខាងត្បូងមួយនេះមាន កិច្ចព្រមព្រៀងពិសេសជាមួយគ្នាសម្រាប់ផ្តល់ឱកាសឲ្យកីឡាការិនី កម្ពុជាចេញទៅហ្វឹកហាត់នៅទីនោះដើម្បីបង្រឹងសមត្ថភាពត្រៀមចូលរួម ការប្រកួតប្រជែងដណ្តើមយកមេដាយនៅក្នុងការប្រកួតស៊ីហ្គេម លើកទី២៧នេះ។
គួររំឭកថា ស៊នដាវីន និង ស៊ន សៀវម៉ី បានឈ្នះមេដាយរៀងៗខ្លួន នាការប្រកួតក្នុងព្រឹត្តិការណ៍ស៊ីហ្គេមលើកទី២៦នៅឥណ្ឌូនេស៊ី កាលពីឆ្នាំ២០១១ ដោយក្នុងនោះ ដាវីន បានឈ្នះមេដាយប្រាក់ ខណៈ សៀវម៉ីឈ្នះមេដាយសំរឹទ្ធ ហេតុនេះហើយទើបខេមរៈសហព័ន្ធតេក្វាន់ដូនិងNOCCផ្តល់ឱកាសឲ្យអ្នក ទាំង២ ចេញទៅហ្វឹកហាត់លើកនេះ នៅមជ្ឈមណ្ឌលតេក្វាន់ដូ Yeong Cheon-Si នាខេត្ត Gyungbuk។
ថ្លែងនៅក្នុងសន្និសីទសារព័ត៌មាន កាលពីថ្ងៃសុក្រ មុនការចេញដំណើររបស់ ស៊ន ដាវីន និង ស៊ន សៀវម៉ី ចេញទៅហ្វឹកហាត់នេះលោក វ៉ាត់ ចំរើនអគ្គលេខាធិការនៃ NOCC បានលើកឡើងថា៖«មជ្ឈមណ្ឌលតេក្វាន់ដូYeongCheon-Siជាសមាគមដ៏ធំ មួយដែលគេស្គាល់ថាជាកន្លែងហ្វឹកហាត់ដ៏ល្បីល្បាញថ្នាក់ពិភពលោក។
សមាគមនេះមានមជ្ឈមណ្ឌលទំនើបគ្រប់គ្រងដោយលោកLeeJongWooហើយលោក ជាអ្នកធានាជួយបំប៉នការហូបចុកការស្នាក់នៅថ្លៃសំបុត្រយន្តហោះ និងការអប់រំបច្ចេកទេសដល់កីឡាការិនីរបស់យើង ក្នុងការចេញទៅហ្វឹកហាត់លើកនេះ។ បន្ថែមពីលើនេះលោកក៏បានផ្តល់ជាសោហ៊ុយចាយសម្រាប់អ្នកទាំង២ផង ដែរ»។
លោកវ៉ាត់ ចំរើន បានបញ្ជាក់ថា៖«ដោយមើលឃើញពីសក្ដានុពលនៃកីឡាតេក្វាន់ដូនៅ កម្ពុជានោះ ទើបខាងកូរ៉េ សុខចិត្តផ្ដល់អាហារូបករណ៍ដល់កីឡាការិនីទាំង២រូបនេះ ហើយអ្វីដែលខាងកូរ៉េចង់បានមកវិញនោះ គឺកីឡាការិនីទាំង២រូបនេះ ត្រូវតែមានសមត្ថភាពដណ្តើមមេដាយនៅស៊ីហ្គេមឲ្យបាន»។
លោកថោងខុនរដ្ឋមន្ត្រីក្រសួងទេសចរណ៍និងជាប្រធានNOCCបានថ្លែង ថា៖«យោងតាមកិច្ចព្រមព្រៀងរបស់ប្រទេសទាំងពីរនៅក្នុងការលើក កម្ពស់វិស័យកីឡាតេក្វាន់ដូនៅកម្ពុជាភាគីកូរ៉េ បានផ្តល់នូវការហ្វឹកហាត់នេះដើម្បីពង្រឹងគុណភាពបច្ចេកទេស ប្រឹងប្រែងឲ្យបានមេដាយមាសក្នុងស៊ីហ្គេមហើយយុទ្ធសាស្ត្រសំខាន់ របស់យើងគឺជំរុញនិងស្វែងរកឲ្យមានដៃគូជួយការហ្វឹកហាត់នៅក្រៅ ប្រទេសព្រោះមានស្តង់ដារអន្តរជាតិហើយវាត្រូវឆ្លើយតបទៅនឹងផែនការ របស់NOCCដែលមានគម្រោងយកមេដាយមាសឲ្យបានពីរខ្ទង់(១០មេដាយ)»។
ចំណែកលោក Choi Yong Sok គ្រូបង្វឹកតេក្វាន់ដូជម្រើសជាតិកម្ពុជា បាននិយាយដែរថា៖«កីឡាការិនីទាំងពីរនេះ មានកាយសម្បទាល្អណាស់ ហើយខ្ញុំមានជំនឿចិត្តថា ពួកគេមានឱកាសច្រើនក្នុងការដណ្ដើមយកមេដាយមាសបាន នាការប្រកួតស៊ីហ្គេមលើកនេះ»។
ស្របពេលជាមួយគ្នានោះដែរលោក នួន ភា ប្រធានខេមរៈសហព័ន្ធតេក្វាន់ដូ បានផ្តាំផ្ញើនិងសំណូមពរឲ្យកីឡាការិនីទាំង២រូប ចេះថែរក្សាសុខភាព និងប្រឹងប្រែងហ្វឹកហាត់ គោរពវិន័យដើម្បីដណ្ដើមឲ្យបាននូវមេដាយមាស នៅក្នុងការប្រកួតស៊ីហ្គេមលើកទី២៧ នាចុងឆ្នាំ២០១៣នេះឲ្យបាន»។
ក្រៅពីការផ្តល់អាហារូបករណ៍ឲ្យកីឡាការិនីតេក្វាន់ដូ ទៅហ្វឹកហាត់នៅកូរ៉េ នេះលោក វ៉ាត់ ចំរើ់ន បានអះអាងថា នៅខែក្រោយៗជាបន្តបន្ទាប់ កីឡាការិនីហុកគីកម្ពុជាមួយក្រុម នឹងចេញទៅហ្វឹកហាត់នៅថៃរយៈពេល២ខែមុនការមកដល់នៃព្រឹត្តិការណ៍ ស៊ីហ្គេមលើកនេះ រីឯកីឡាសីប៉ាក់តាក្រ និង ទូកប្រពៃណីត្រូវចេញទៅហ្វឹកហាត់នៅមីយ៉ាន់ម៉ាផងដែរ៕
(ប្រភព៖ ខ្មែរប៉ុស្តិ៍)
